Innsýn í námið
Grunnur fyrir málm- og véltækni
Námið hentar þeim sem hafa ekki ákveðið hvaða málm- eða véltæknigrein verður fyrir valinu s.s. stálsmíði, blikksmíði, rennismíði, vélvirkjun, flugvirkjun, vélstjórn eða bifvélavirkjun.
Einnig góð námsleið ef þú hefur ekki náð lágmarksárangri í stærðfræði, ensku eða íslensku til að komast inn í fagnámið því skólinn býður upp á fornámsáfanga í kjarnafögum úr grunnskóla sem hægt er að taka með fagnáminu.
Brautin er kennd í dagnámi í Hafnarfirði og tekur eina til þrjár annir.
Brautarlýsing
TH-GMV17 Grunnnám málm- og véltæknigreina
Þetta er 1-3 anna nám í grunnáföngum almennra- og faggreina ætlað þeim sem hyggja á frekara nám í málm- eða véltæknigreinum framhaldsskóla, s.s. stálsmíði, blikksmíði, rennismíði, vélvirkjun, flugvirkjun, vélstjórn eða bifvélavirkjun. Námið hentar þeim sem hafa ekki ákveðið hvaða málm- eða véltæknigrein verður fyrir valinu, og þeim sem eiga eftir að ná lágmarksárangri í stærðfræði, ensku eða íslensku til að komast inn í fagnámið sem þeir óska.
Ekki er krafa um ákveðna framvindu í þessu námi en þegar nemandi hefur ákveðið sig og uppfyllir inntökuskilyrði þá getur hann valið viðeigandi fagbraut málm- og véltæknigreina og haldið þar áfram og klárað þá braut.
Námsskipulag brautar eftir önnum
Almennar upplýsingar
Inntökuskilyrði
Ekki er gerð krafa um sérstök inntökuskilyrði, og meðan nemendur, sem þess þurfa, eru að ná lágmarksárangri í kjarngreinum eru þeir í áhugaverðu iðnnámi málm- og vélgreina samhliða.
Að loknu námi
Ekki er um önnur réttindi að ræða en að nemendur öðlast rétt til að hefja nám í faggrein eftir að hafa náð lágmarksárangri í kjarnagreinum.
Faggreinarnar eru kenndar í Véltækniskólnum og þú getur fundið þær í leit að námi undir flokknum véltækni og vélstjórn.
Umsagnir
Sigurður fór í nám í verkfræði í Háskólanum eftir nám í Véltækniskólanum.
„Fjölbreytnin í náminu er góður grunnur. Ég finn að ég stend betur að vígi en margir sem eru með mér í verkfræðináminu hér í Háskólanum.“
Rafnar Snær Baldvinsson lauk námi í vélstjórn
Vélstjórnarnámið er mjög fjölbreytt, inniheldur mikið af nytsamlegum upplýsingum og hefur frábæra kennara sem miðla þekkingu eins og þeim einum er lagið. Þetta nám opnar margar dyr og gerir að verkum að það er fátt sem að flækist fyrir manni í framtíðinni. Ég mæli eindregið með þessu námi ef að þú ert forvitin/n um virkni hluta og/eða viðgerðir.
Valdimar Árnason lauk námi í flugvirkjun
Í byrjun árs 2017 var komið að því, ég ætlaði að gera eitthvað meira en bara vinna. Mig langaði að gera eitthvað sem ég hafði virkilega áhuga á. Var búinn að velta þessu fyrir mér í kannski tvö ár og svo sá ég auglýsingu á Facebook fyrir flugvirkjanám Tækniskólans. Auglýsingin poppaði auðvitað upp á mínum skjá því ég hef haft brennandi áhuga á flugvélum síðan ég var 4 ára og er með fullt að flugvélatengdum síðum á Facebook.
Ég sé ekki eftir að hafa sótt um þetta sérnám því ég kynntist fólki frá öllum stéttum samfélagsins. Fólk sem hafði mismikinn áhuga en vildi gera það sama og ég, finna sér eitthvað sem væri öðruvísi en þau höfðu verið að vinna við. Gaman var að fylgjast með þeim öllum fá aukinn áhuga fyrir þessum tækjum háloftanna með mér.
Námið er skemmtilegt og mjög fjölbreytt en á köflum ansi strembið og voru flestir kennararnir mjög færir að einfalda efnið fyrir manni. Það sem ég tek úr þessu er auðvitað námið og kunnátta mín að leysa vandamál en þessi tvö ár með bekkjarfélögunum stendur upp úr. Tveir mánuðir fyrir norðan á Akureyri í verklegu námi virkilega þéttu hópinn og er maður heppinn að hafa eignast svona marga vini.
- Námið fjölbreyttara en ég hélt
- Þetta nám opnar margar dyr
- Flugvirkjun er eitthvað sem ég hef virkilegan áhuga á
FAQ
Spurt og svarað
Þarf að eiga sérstakan búnað fyrir námið?
Nemendur sem hefja nám í Véltækniskólanum verða að koma með eigin öryggisskó, hlífðargleraugu og heyrnahlífar sem skylt er nota í verklegu námi skólans og við aðra vinnu þar sem kennarar krefjast þess að nemendur noti hlífðarbúnað.
Hvernig kemst ég á starfssamning?
IÐAN fræðslusetur sér um námssamninga fyrir málm- og véltæknigreinar. Sjá einnig næsta skref um störf í greininni.
Hvenær hefst kennsla?
Sjá upplýsingar í skóladagatali Tækniskólans.
Hvað kostar námið?
Sjá upplýsingar um skólagjöld í gjaldskrá Tækniskólans.
Er námið lánshæft?
Menntasjóður námsmanna veitir allar upplýsingar um lánshæfi náms á menntasjodur.is
Eru efnisgjöld?
Nei, efnisgjöld eru innifalin í skólagjöldum.
Er mætingarskylda?
Já, hér má sjá nánari reglur um skólasókn í Tækniskólanum.
Er nemendafélag?
Nánari upplýsingar um félagslíf og nemendafélög Tækniskólans.
Hvernig sæki ég um?
Sækja um hnappur er hér á síðunni.