Nýr Tækniskóli við Flensborgarhöfn
Samkomulag um nýbyggingu Tækniskólans
Nýr tækniskóli rís við Flensborgarhöfn í Hafnarfirði. Stjórnvöld, Hafnarfjarðarbær og Tækniskólinn undirrituðu skuldbindandi samkomulag þess efnis þann 27. júní. Hildur Ingvarsdóttir, skólameistari Tækniskólans, Egill Jónsson stjórnarformaður skólans, ásamt Rósu Guðbjartsdóttur, bæjarstjóra Hafnarfjarðar, Ásmundi Einari Daðasyni, barna- og menntamálaráðherra, Sigurði Inga Jóhannssyni, fjármála- og efnahagsráðherra og Bjarna Benediktssyni, forsætisráðherra undirrituðu samkomulagið í blíðskaparveðri á Norðurbakkanum.
Næstu skref eru undirbúningur hönnunar og framkvæmdar með áætluð verklok árið 2029. Fyrirhuguð er 30.000 fermetra bygging sem rúmar um 3.000 nemendur á gróskumiklu hafnarsvæði í námunda við fjölbreytta atvinnustarfsemi. Framkvæmdin verður í tveimur áföngum, í fyrri áfanga verði reist um 24.000 m2 bygging og í seinni áfanga um 6.000 m2 viðbót. Þá er gert ráð fyrir frekari stækkunarmöguleikum á lóðinni í framtíðinni.
Með nýjum höfuðstöðvum Tækniskólans er langþráðum áfanga náð, á þeirri vegferð að sameina allt nám skólans undir einu þaki.
„Nú byggjum við af stórhug til framtíðar og það er löngu tímabært að sameina starfsemina á einum stað. Verkefnið hefur verið lengi í undirbúningi og við erum afar þakklát stjórnvöldum og Hafnarfjarðarbæ fyrir þann stuðning og traust sem þau sýna skólanum með aðkomu sinni að þessu stóra verkefni. Ábyrgð skólans er mikil og við höfum undirbúið verkefnið af kostgæfni og erum sannfærð um að nýbygging skólans og hugmyndafræðin að baki grunnhönnun hennar muni stórefla iðn-, starfs- og tækninám í landinu,“ sagði Egill Jónsson, formaður stjórnar Tækniskólans.
Hér er um að ræða framkvæmd sem mun vafalaust hafa jákvæð áhrif á framþróun iðn-, starfs- og og tæknináms á Íslandi, með nútímalegum Tækniskóla, á gróskumiklu hafnarsvæði í námunda við fjölbreytta atvinnustarfsemi. Starfsemi skólans verður einnig fengur fyrir Hafnarfjarðarbæ og mun án efa styrkja og styðja við þá starfsemi sem fyrir er í bænum.
Hildur Ingvarsdóttir, skólameistari Tækniskólans, flutti ávarp í tilefni samkomulagsins.
„Það er svo sannarlega bjart yfir í dag. Að undirrita þetta samkomulag er langþráður áfangi á krefjandi ferðalagi. Ferðalagi sem hófst fyrir 6 árum síðan og lýkur vonandi á næstu 5 árum. Ferðalagi sem hefur það skýra markmið að efla iðn-, starfs- og tækninám á Íslandi. Það ætlum við að gera með því að byggja upp framúrskarandi aðstöðu fyrir nemendur okkar og starfsfólk og um leið enn betra samfélag náms og nýsköpunar í húsi sem býður jafnframt nærsamfélagið velkomið.“
Hér má lesa ávarp skólameistara í heild sinni.