Kafli 10 – Skólanámskrá
Tækniskólinn leggur mikið upp úr öflugi stoðþjónustu sem ætlað er að styðja við nemendur og starfsfólk skólans. Þjónustan er fjölbreytt og nær meðal annars yfir aðstoð í námi, sérkennslu, stuðning, náms- og starfsráðgjöf, sálfræðiaðstoð, forvarnir, tölvuþjónustu og aðstoð í félagsmálum.
Bókasafn, Framtíðarstofa, skrifstofa skólans og alþjóðamál heyra undir Upplýsinga- og alþjóðadeild.
Meginhlutverk deildarinnar er að veita nemendum og starfsfólki Tækniskólans greiðan aðgang að upplýsingum, aðstoða við nám og kennslu í Framtíðarstofu og á bókasafni, auk þess að sjá um alþjóðamál skólans, sækja um Erasmus+ styrki og hafa umsjón með nýtingu þeirra.
Framtíðarstofan er hönnunar- og hátækniverkstæði Tækniskólans og þangað geta nemendur og starfsfólk komið og fengið aðstoð við að vinna úr hugmyndum sínum og gera þær að veruleika.
Á skrifstofu skólans tekur starfsfólk m.a. á móti fyrirspurnum frá nemendum jafnt sem almenningi og veitir almennar upplýsingar um nám og kennslu.
Á bókasafninu er veitt fjölþætt þjónusta, s.s. aðstoð við upplýsingaöflun, heimildaleit og kennsla í notkun heimilda, útlán, uppsetningu verkefna og prentun auk persónulegrar aðstoðar við tölvunotkun. Safnið stendur fyrir kennslu í upplýsingalæsi fyrir fyrsta árs nemendur og starfsfólk kennir jafnframt hvernig fara skal með heimildir í ritgerðum og lokaverkefnum.
Þjónusta Upplýsinga- og alþjóðadeildar er veitt í öllum aðalbyggingum Tækniskólans.
Tölvuþjónusta er staðsett á Skólavöðuholti, Háteigsvegi og í Hafnarfirði. Hún er opin alla virka daga frá 8:00-16:00, sjá nánar https://tskoli.is/tolvuthjonusta/
Hlutverk námsversins er að þjónusta þá nemendur sem eiga við námserfiðleika af einhverju tagi. Í námsveri fá nemendur aðstoð við prófatöku og stuðning við heimanám sem og almenna aðstoð í grunngreinum. Einnig er hægt að leita til námsversins við verkefna- og ritgerðasmíð.
Við Tækniskólann starfa náms- og starfsráðgjafar. Markmið ráðgjafarinnar er að veita nemendum þjónustu í málum sem tengjast persónulegum högum þeirra, námi og náms- og starfsvali. Þá er námsráðgjafa ætlað að veita foreldrum, forráðamönnum, kennurum og öðru samstarfsfólki ráðgjöf í málum einstakra nemenda. Náms- og starfsráðgjafar eru bundnir trúnaði við skjólstæðinga sína. Innan skólans eru þeir málsvarar nemendanna.
Við Tækniskólann starfar sálfræðingur og veitir sálfræðiþjónustu við nemendur, foreldra, forráðamenn og starfsfólk. Nemendur geta meðal annars leitað til sálfræðings vegna tilfinningalegra erfiðleika, svo sem kvíða eða þunglyndis, vegna félagslegrar einangrunar, samskipta, félagsfærni, vinamála, sambandserfiðleika, fjölskyldumála, námstækni, skipulags, markmiðssetningar, vegna gruns um ADHD eða annarra raskana. Sálfræðiviðtal getur verið fyrsta skrefið varðandi nánast öll vandamál og hugðarefni nemenda, sjá nánar á vef skólans.
Nemendum Tækniskólans býðst þjónusta hjúkrunarfræðings, sjá nánar á vef skólans.
Stefna Tækniskólans er að styðja nemendur í að setja sér skýr markmið í lífinu og vinna markvisst að því að ná þeim. Við leggjum áherslu á lífshætti sem leiða til sjálfsvirðingar, sjálfsstjórnar og árangurs. Starf verkefnastjóra forvarna- og félagsmála er hluti af framkvæmd þessarar stefnu.
Sjá nánar um forvarnarstefnu skólans og verkefnastjóra forvarnar- og félagsmála.
Unnið er að innleiðingu farsældarlaga í Tækniskólanum. Meginmarkmið laganna er að tryggja börnum og foreldrum, aðgang að samþættri þjónustu við hæfi án hindrana.
Í Tækniskólanum er lögð áhersla á góðan starfsanda, þar sem ríkir traust, trúnaður, jafnræði og hreinskilni milli alls starfsfólks. Starfsfólki ber að temja sér kurteisi og háttvísi í framkomu og sýna hvort öðru tilhlýðilega virðingu og jákvætt viðmót.
Stefna Tækniskólans er að einelti, kynferðisleg áreitni, kynbundin áreitni, ofbeldi og ótilhlýðileg háttsemi í hvaða mynd sem er, sé ekki liðið. Leita skal allra ráða til að fyrirbyggja slíkt og leysa þau mál sem upp koma á sem farsælastan hátt. Í skólanum skal lögð áhersla á að efla vitund starfsfólks og nemenda um mikilvægi jákvæðra samskipta og gera þau einkennandi í skólasamfélaginu, t.d. með fræðslu um jafnrétti.
Viðbrögð við einelti, kynferðislegri áreitni, kynbundinni áreitni, ofbeldi og annarri ótilhlýðilegri háttsemi eru nánar skilgreind í VKL-107. Meðferð eineltis, áreitis- og ofbeildismála, sjá nánar VKL-412.
Aðalhlutverk vef Tækniskólans er að vera upplýsingaveita sem gefur skýra mynd af starfi skólans. Honum er og ætlað að veita notendavæna þjónustu til nemenda, foreldra/forráðamanna, starfsfólks og annarra notenda. Vefnum er ætlað að spegla margbreytilegt hlutverk skólans, þjónustu og námsframboð hans samkvæmt aðalnámskrá og skal vefsíðan þjóna hlutverki sínu til miðlunar upplýsinga, um innri og ytri starfsemi með áherslu á gildi Tækniskólans.
Uppfært 6. desember 2024
Áfangastjórn