Innsýn í námið
Skapandi hönnun og tækni
Nemendur læra að hanna og setja fram efni fyrir prent-, net- og skjámiðla. Kennt er á öll helstu myndvinnslu-, umbrots-, vef- og tækniforrit.
Grafískur miðlari setur upp efni fyrir birtingu hvort sem það er á vef eða á prenti. Hann sér um umbrot, útlit, hugmyndavinnu, textagerð, myndvinnslu, tæknilegan frágang og stafræna prentun.
Grafísk miðlun er fjölbreytt og hagnýtt nám og einnig skemmtileg leið til stúdentsprófs.
Brautarlýsing
GFM23 Grafísk miðlun
Meginmarkmið námsins er að nemendur öðlist þá þekkingu og færni sem prentsmiður/grafískur miðlari er nauðsynleg í störfum sínum, m.a. við móttöku á fjölmiðlaefni, texta og myndefni og frágang á því til prentunar eða birtingar. Stór hluti námsins felst í hönnun og umbroti þar sem unnið er með myndir og texta. Prentsmiður/grafískur miðlari þarf að kunna góð skil á textameðferð, þekkja vel leturgerðir og stílbrigði og hafa gott vald á myndbyggingu og táknfræði síðuhönnunar. Hann á að geta tekið á móti gögnum og gengið frá efni til prentunar í samræmi við gæðakröfur í prentsmiðjum. Prentsmiður/grafískur miðlari þarf einnig að kunna skil á vefsmíðum og viðmótshönnun sem og útlitshönnun fyrir sjónvarp og netmiðla. Í náminu er fjallað um grafíska hönnun og framsetningu efnis fyrir prent-, net- og skjámiðla. Áhersla er m.a. á prentsmíð, týpógrafíu og grafíska hönnun, umbrot, margmiðlun og textameðferð, stafræna uppbyggingu mynda og litstýringu. Nemendur vinna með öll helstu texta-, teikni-, myndvinnslu- og umbrotsforrit, auk vefforrita. Náminu lýkur með sveinsprófi er veitir rétt til starfa í iðninni og til inngöngu í nám til iðnmeistaraprófs. Prentsmíð er löggilt iðngrein.
Almennar upplýsingar
Inntökuskilyrði
Fyrst þarf að klára grunnnám upplýsinga- og fjölmiðlagreina. Þegar því námi er lokið þá geta nemendur sótt um nám í grafískri miðlun, sem er sérsvið.
Námsframvinda
Námið er samtals fimm annir í skóla með grunnnáminu og vinnustaðanám samkvæmt hæfnikröfum ferilbókar að hámarki 32 vikur. Almennt er miðað við að nemendur hafi lokið starfsþjálfun í síðasta lagi áður en nám hefst í lokaáföngum fagbrautar eða samhliða.
Námsframvinda vinnustaðarnáms miðast við að nemandinn sé búinn að uppfylla að lágmarki 80% af hæfniviðmiðum í ferilbók faggreinar til að innritast í lokaáfanga brautar.
Að loknu námi
Grafísk miðlun er löggilt iðngrein.
Prófskírteini af fagbraut ásamt því að starfsþjálfun sé lokið, veitir rétt til að sækja um sveinspróf í viðkomandi grein. Sveinspróf veitir rétt til að hefja nám í Meistaraskóla.
Einnig er hægt að ljúka viðbótarnámi til undirbúnings námi á háskólastigi en slíku námi lýkur með stúdentsprófi.
Starfsvettvangur prentsmiða/grafískra miðlara er til dæmis hjá prentfyrirtækjum, auglýsingastofum, blaðaútgáfum, innan markaðsdeilda fyrirtækja og sem sjálfstæður atvinnurekandi.
Verkefni nemenda
T-ið í TÆKNÓ
Glænýtt skólablað
Grafísk miðlun
Útskriftarsýning og Askur
Útskriftarvefur nemenda í grafískri miðlun
Útskriftarvefur nemenda í grafískri miðlun
Tímarit nemenda
í grafískri miðlun
Askur
Umsagnir
Axel Fannar Friðriksson útskrifaðist haustið 2014 og vinnur á auglýsingastofu í London
„Eftir þetta nám við Upplýsingatækniskólann, margfaldaðist reynslan mín og vitneskja þannig ég leyfði mér að trúa að ég gæti unnið við það sem mér finnst skemmtilegt. Yndislegir kennarar, skemmtilegur nemendahópur og fjölbreytt verkefni gerðu mig mjög tilbúinn að takast á við áskoranir og verkefni í faginu. Eins græddi ég fullt af tengingum og sambönd sem ég held upp á enn í dag.“
Björgvin Pétur Sigurjónsson stundaði margmiðlunarhönnun í Kolding og 3D hreyfimyndahönnun í Los Angeles.
„Námið veitti mér öryggi í grafískum forritunum og ég hef séð að ég hef haft sterkari þekkingu á þessum forritum fram yfir aðra samnemendur mína í því framhaldsnámi sem ég fór í. Ég lærði margt sem er oftast ekki kennt í öðrum skólum tengt hönnun, eins og umbrot, undirbúningur fyrir prent og almennt tæknilegar útfærslur á hinum ýmsu hlutum. Þetta gagnast mér mjög mikið í dag.“
Haraldur Örn Arnarson útskrifaðist 2016 og tók starfsþjálfun hjá Prentsmiðjunni Odda
„Námið í grafískri miðlun hefur veitt mér mikla þekkingu og færni í helstu vinnsluforritum tengd prentverki. Má þar nefna Photoshop, Illustrator og InDesign. Einnig hefur námið gagnast mér mjög vel í vinnunni við ýmsar hliðar prentverks, sem ég hef mikinn áhuga á.“
- Allt frá hönnun á prentmiðlum í gerð myndbanda
- Framhaldsnám erlendis – stofnaði svo auglýsingastofu
- Vinnur í Prentmet við stafræna prentun
FAQ
Spurt og svarað
Er öruggt að ég komist í starfsþjálfun / á samning til að klára námið?
Það er erfitt að fullyrða um að nemendur komist í starfsþjálfun eftir að námi í skólanum lýkur. Það fer allt eftir eftirspurn hverju sinni.
Hvað kostar námið?
Sjá upplýsingar um skólagjöld í gjaldskrá Tækniskólans.
Er námið lánshæft?
Menntasjóður námsmanna veitir allar upplýsingar um lánshæfi náms á menntasjodur.is
Eru efnisgjöld?
Nei, efnisgjöld eru innifalin í skólagjöldum.
Hvenær hefst kennsla?
Sjá upplýsingar í skóladagatali hér á vefnum.
Hvar fer kennslan fram?
Kennsla í grafískri miðlun fer fram í Sjómannaskólahúsinu Háteigsvegi. En einnig fara nemendur á sérsviðinu út í fyrirtæki.
Er mætingarskylda?
Já, nánari reglur um skólasókn er að finna hér á vefnum.
Er nemendafélag?
Upplýsingar um félagslíf og nemendafélag eru á síðu um félagslíf.