Síðasti starfsdagur samkvæmt námsáætlun og stundaskrám er birtur í skóladagatali en kennslulok geta verið mismunandi eftir áfanga. Nánari upplýsingar um skipulag hvers áfanga eru í Canvas. Á námsmatsdögum fer það eftir skipulagi áfanga hvort nemendur þurfa að mæta í próf, endurtökupróf eða skila síðustu verkefnunum en hver nemandi fær upplýsingar um það hjá sínum kennara.
Kennarar setja fyrir próf og verkefni í Canvas. Nemendur eru hvattir til að yfirfara þetta vandlega í öllum áföngum og vera í sambandi við kennara ef þeir hafa spurningar eða athugasemdir.
Lokaeinkunnir verða birtar í Innu þann 17. desember. Nemendur eru hvattir til að skoða námsmat og fara yfir einkunnir. Kennara verða til viðtals í sínum deildum kl. 10:00-12:00.
Nemandi á útskriftarönn sem getur ekki útskrifast vegna falls í einum eða tveimur áföngum getur fengið heimild til að taka upptökupróf í áfanganum eða áföngunum ef hægt er að koma því við í samráði við viðkomandi skólastjóra og ef upptökupróf er framkvæmanlegt vegna umfangs áfangans. Ef áfanginn er verklegur er ekki framkvæmanlegt að taka upptökupróf. Nemandi skráir sig í upptökupróf á skrifstofu og greiðir þar skráningargjald í síðasta lagi á lokanámsmatsdegi. Einkunn fyrir úrlausn í upptökuprófi gildir sem lokaeinkunn í áfanganum. Upptökupróf verða haldin 18. desember kl. 10:00. Sjá gjaldskrá fyrir upptökupróf fyrir útskriftarefni.
Brautskráning skólans verður þann 21. desember í Hörpu.
Mikilvægar dagsetningar eru í skóladagatali og í Innu.
Uppfært 15. júní 2026
Áfangastjórn