Innsýn í námið
Tækni við fjölmiðla
Nám í hljóðupptöku og vinnslu eins og best gerist á heimsvísu. Þú öðlast haldgóða þekkingu á upptökutækni, hljóðfræði og rafmagnsfræði sem tengist hljóði. Auk þess lærirðu að þekkja vel forsendur stafrænnar tækni og haldgóða tónfræði og að þekkja vel hegðun hljóðs og eðlisfræðilögmál þess.
Námið er hnitmiðað hljóðvinnslunám með áherslu á upptökur, hljóðvinnslu og hljóðsetningu ásamt ýmsu sem kemur sér vel í þessari faggrein.
Kennsla fer m.a. fram í starfandi stúdíói hjá Stúdíó Sýrlandi.
Nemendur ljúka náminu á einu ári – þremur önnum. Námið er 90 einingar.
Brautarlýsing
HLT18 Hljóðtækni
Markmið hljóðtæknibrautar er að búa nemendur undir að geta starfað sjálfstætt við hljóðvinnslu, upptöku og hljóðsetningu. Að loknu námi eiga nemendur að þekkja og kunna að vinna með helsta tækjabúnað sem notaður er í hljóð- og upptökuverum, við tónleikahald og við streymi á netið. Hljóðmaður býr yfir hæfni til að vinna sjálfstætt að upptökum og vinnslu, veita ráðgjöf og gera ítarlegar tíma- og kostnaðaráætlanir. Hann er auk þess fær um að skila sinni vinnu í samstarfi við framleiðanda eða verkkaupa. Hann hefur djúpan skilning á þeim búnaði, verkferlum og fræðum sem snúa að starfinu. Hann getur viðað að sér aukinni þekkingu í samræmi við þau verkefni sem fyrir liggja með því að nýta sér miðla og upplýsingar sem snúa að faginu. Hann getur auk þess nýtt sér þessa auknu þekkingu við störf sín.
Almennar upplýsingar
Inntökuskilyrði
Einungis er innritað í þetta nám á vorönn. Umsóknartímabil er í nóvember til desember.
Þú þarf að hafa lokið grunnskóla og tveggja anna framhaldsskólanámi, að lágmarki 60 einingum, þar af að lágmarki 10 einingum í ensku, 10 einingum í íslensku og 10 í stærðfræði, allt á 2. þrepi.
Einnig er æskilegt að hafa stundað tónlistarnám eða hafa reynslu af tónlistarflutningi.
Innritað er og tekið inn í námið á vorönn ár hvert.
Að loknu námi
Nemendur sem klára þetta nám veljast í tæknistörf við hljóðvinnslu ljósvakamiðla. Það er t.d. hljóðupptökur og útsendingar útvarpsstöðva, sjónvarpsstöðva og blaðamiðla sem nýta sér vefvarp.
Einnig vinna í hljóðverum, við upptökur og eftirvinnslu, talsetningu, upptöku á hljómsveitum og ýmiskonar viðburðum til útgáfu eða beinna útsendinga.
FAQ
Spurt og svarað
Hvernig sæki ég um?
Sækja um hnappur er hér á síðunni – þegar opnar fyri innritun og umsókn fer í gegnum Innu innritunarvef.
ATH. Aðeins er opið fyrir umsóknir á vorönn( í nóvember ár hvert). Nemandi byrjar í náminu í janúar.
Hvað kostar námið?
Sjá upplýsingar um skólagjöld í gjaldskrá Tækniskólans.
Er námið lánshæft?
Menntasjóður námsmanna veitir allar upplýsingar um lánshæfi náms á menntasjodur.is
Eru efnisgjöld?
Kostnaður við bókakaup er u.þ.b. 55 þúsund krónur fyrir árið.
Mikið er lagt upp úr notkun Pro Tools hljóðvinnsluforritsins. Nemendur eiga kost á að leigja eða kaupa ProTools hljóðvinnsluforritið. Leyfi fyrir 12 mánuði kostar tæpar 8€ á mánuði (vor 2018) en einnig er hægt að kaupa það á nálægt 45 þúsund krónur og er það þá með 50% afslætti til nemenda.
Gott er að hafa góð heyrnartól við tölvuna en verð á þeim er mjög breytilegt.
Hvenær hefst kennsla?
Nám í hljóðtækni hefst um miðjan janúar ár hvert. Upphaf hverrar annar er örlítið breytilegt en sumarönn byrjar að jafnaði rétt upp úr júníbyrjun og haustönnin um eða upp úr 10. september. Upplýsingar um nánari dagsetningar koma frá fagstjóra.
Hvar fer kennslan fram?
Kennsla fer fram að mestu í Stúdío Sýrlandi að Vatnagörðum 4 en einnig hjá Tóney í Síðumúla 8 í Reykjavík.
Þarf ég að vera með fartölvu?
Nemendur í hljóðtækni þurfa að hafa fartölvu.
Er mætingarskylda?
Já, nánari reglur um skólasókn er að finna hér á vefnum.
Er nemendafélag?
Í Raftækniskólanum er starfandi skólafélag sem hefur það hlutverk að tengja stjórnendur skólans við nemendur og koma með athugasemdir og óskir um hluti sem betur mega fara. Jafnframt er skólafélagið tengiliður stjórnenda við nemendur. Fulltrúi skólafélagsins situr fundi með stjórnendum reglulega sem og fagráði skólans.
Skólafélagið skipar nefndir til að sjá um félagslíf innan skólans og uppákomur.
Nemendur sjá sjálfir um að móta, þróa og byggja upp félagsstarf. Saman mynda skólafélög innan Tækniskólans Nemendasamband Tækniskólans NST.
Raftækniskólinn er með spjallsíðu (hóp) á Facebook.