Innsýn í námið
Spennandi og krefjandi stúdentsnám
K2 tækni- og vísindaleið Tækniskólans er framsækið þriggja ára stúdentsnám fyrir nemendur sem vilja læra með því að skapa, rannsaka og leysa raunveruleg viðfangsefni. Námið fer fram í bekkjakerfi þar sem nemendur fylgjast að í kjarnagreinum, vinna í sínum námshópi og hafa aðgang að heimastofu og vinnustofu sem styður við samvinnu, verkefnavinnu og skapandi hugsun. Á brautinni er lögð áhersla á vísindi, tækni, nýsköpun, lausnaleit og sjálfstæð vinnubrögð.
Nemendur geta jafnframt valið fjölbreytta áfanga, bæði innan K2 og þvert á aðrar brautir Tækniskólans. Á lokamisseri er meðal annars í boði að taka bóklegan hluta einkaflugmannsnámsins sem stóran hluta af vali, eða 15 einingar. K2 er skipulögð í samstarfi við Háskólann í Reykjavík og leiðandi fyrirtæki og stofnanir á sviði umhverfisfræði, vísinda, tækni og nýsköpunar. Nemendur fá þannig tækifæri til að tengjast háskólaumhverfinu, atvinnulífinu og verkefnum sem skipta máli í samtímanum.
Á námsferlinum taka nemendur þátt í fjölbreyttum þverfaglegum verkefnum, bæði hér heima og í alþjóðlegu samstarfi, meðal annars Erasmus+, eTwinning og NordPlus. Nemendur K2 hafa jafnframt náð góðum árangri í innlendum og erlendum keppnum, meðal annars í Umhverfisfréttafólki Landverndar, YRE (Young Reporters for the Environment), Ungum frumkvöðlum, Greindu betur og Evrópska tölfræðimótinu. K2 er fyrir nemendur sem vilja krefjandi, skapandi og lifandi nám þar sem hugmyndir verða að verkefnum og verkefni að reynslu fyrir framtíðina.
Brautarlýsing
K2-21 Tækni- og vísindaleið
Tækni- og vísindaleið er stúdentsbraut þar sem hugað er sérstaklega að því að námið sé áhugavekjandi, ögrandi og eflandi. Námsbrautin er gerð í samræmi við aðalnámskrá framhaldsskóla og samkvæmt leiðbeinandi viðmiðum frá mennta- og menningarmálaráðuneytinu. Skipulag og uppbygging brautarinnar var unnin í samstarfi við Háskólann í Reykjavík og samstarfsaðila úr atvinnulífinu. Þróun brautarinnar á komandi árum miðar við áframhaldandi samstarf þessara aðila. Kennsla við brautina fer fram í lotum.
Almennar upplýsingar
Inntökuviðmið
Ef umsóknir nýnema um skólavist á K2 tækni- og vísindaleið eru fleiri en hægt er að verða við er reiknuð meðaleinkunn íslensku, ensku og stærðfræði og umsóknum raðað eftir þeirri meðaleinkunn. Við mat á umsóknum er jafnframt litið til styrkleika hvers og eins en mikið er lagt upp úr því að hafa fjölbreyttan nemendahóp.
Fyrirspurnir varðandi inntöku og annað brautartengt skal senda til brautarstjóra, Sigríðar Halldóru Pálsdóttur, [email protected].
Að námi loknu
Náminu lýkur með stúdentsprófi. Námið er tækni- og vísindamiðað en einnig er lögð mikil áhersla á verkefnastjórnun, nýsköpun og frumkvöðlahugsun.
Verkefni nemenda
K2 í Umhverfisfréttafólki
K2 nemendur láta sig umhverfið varða
Jöklarnir okkar
Jöklar og loftslagsbreytingar
Saga, vísindi, tækni og samfélag mætast
París – Borg vísinda og tækni!
Ungir frumkvöðlar
Hugmyndir sem verða að veruleika!
Skipulag
- Námsbrautin
- Námsbrautarreglur K2
- Kynningarefni
Kjarni: 183 einingar – Nemendur taka alla kjarnaáfanga með sínum bekk. Þeir eru kenndir af kennurum brautarinnar og kennsla fer fram á K2-ganginum á Skólavörðuholti eða í húsnæði HR við Öskjuhlíð.
Lokaverkefni (hluti af kjarna) – Á seinni spönn hverrar annar vinna nemendur að sérstökum þematengdum lokaverkefnum sem eru hluti af dagskrá þeirra. Verkefnin eru metnaðarfull og unnin í samstarfi við valda aðila úr fræðasamfélaginu og atvinnulífinu.
Valáfangar eru 27 einingar.
K2 tækni- og vísindaleið fylgir sömu skólareglum og aðrar námsbrautir Tækniskólans. Einnig gilda sérstakar námsbrautarreglur um brautina.
FAQ
Spurt og svarað
Hvernig sæki ég um?
Sótt er um nám á K2 með því að smella á hnappinn „Sækja um“ hér að ofan. Allar umsóknir fara í gegnum Menntagátt.
Hvað kostar námið?
Upplýsingar um skólagjöld er að finna í gjaldskrá Tækniskólans. Fyrir utan skólagjöld mega nemendur á K2 búast við því að leggja út fyrir ýmsum námsgögnum auk þess sem þeir þurfa að eiga fartölvu.
Eru efnisgjöld?
Bein efnisgjöld eru engin en nemendur á K2 gera ráð fyrir að leggja út fyrir ýmsum námsgögnum auk þess sem þeir þurfa að eiga fartölvu. Með námsgögnum er til að mynda átt við gjöld vegna námsferða, kostnað vegna menningarferða, kaup á tölvuforritum, tölvubúnaði, bókum/bókahlutum eða greinum.
Hvenær hefst kennsla?
Upplýsingar um upphaf og lok kennslu er að finna á skóladagatali hér á vefnum. Alla jafna hefst kennsla að hausti í seinni hluta ágústmánaðar og í fyrstu viku janúar á vorönn.
Hvar fer kennslan fram?
Kennsla á K2 fer fram í aðalbyggingu Tækniskólans á Skólavörðuholti og í Háskólanum í Reykjavík. Að auki fara nemendur í ýmis ferðalög og vettvangsheimsóknir, bæði í Reykjavík og víðar.
Þarf ég að vera með tölvu?
Nemendur á K2 þurfa að koma með eigin tölvu til að vinna á.
Er mætingarskylda?
Já, nánari reglur um skólasókn má finna á vef Tækniskólans.
Er nemendafélag?
Nemendasamband Tækniskólans, NST, heldur viðburði og skemmtanir fyrir alla nemendur. Minni nemendafélög halda utan um viðburði sem ætlaðir eru nemendum í ákveðnum undirskólum eða brautum Tækniskólans. Þá eru ýmsar nefndir starfandi undir hatti NST, svo sem jafnréttisnefnd, skemmtinefnd og tækninefnd.
Nánari upplýsingar um nemendafélögin er að finna á síðu um félagslífíð.