Kafli 19 – Skólanámskrá
Í Tækniskólanum er skólaráð sem hefur það hlutverk er að vera skólameistara til samráðs og aðstoðar. Það fjallar um starfsáætlun skólans og framkvæmd hennar, skólareglur, umgengnishætti í skólanum, vinnu- og félagsaðstöðu nemenda og stefnumótun skólans auk annarra mála sem vísað er til skólaráðs. Skólaráð stendur jafnframt fyrir árlegum opnum skólafundi sem er lýðræðislegur vettvangur til skoðanaskipta og ábendinga um skólastarfið.
Skólaráð er skipað til eins árs í senn. Skólameistari er oddviti skólaráðs en auk hans er ráðið skipað aðstoðarskólameistara, fulltrúum nemenda, fulltrúum kennara og félagsmálafulltrúa. Aðrir eru kallaðir inn eftir atvikum. Skólaráð starfar á starfstíma skóla og eru fundir haldnir a.m.k. einu sinni á önn. Ráðið má kalla saman oftar beri nauðsyn til.
Skólanefnd skólans er skipuð stjórn skólans, skólameistara ásamt einum kennara og einum nemanda. Nefndin fundar á sex mánaða fresti.
Starfsmannafundir eru haldnir að lágmarki tvisvar á önn og sama gildir um kennarafundi.
Skólaárinu er skipt upp í tvær annir og hver önn skiptist í tvær spannir. Haustönn hefst upp úr miðjum ágúst og vorönn lýkur fyrir lok maí. Skólameistari og aðstoðarskólameistari leggja drög að skóladagatali fyrir næsta skólaár til samþykktar í Rekstrarráði. Skóladagatal er birt á vefsíðu skólans, með fyrirvara um hugsanlegar breytingar.
Uppfært 9. desember 2024
Áfangastjórn