Hin árlega nýnemaferð Tækniskólans verður fimmtudaginn 29. ágúst næstkomandi. Farið verður á Stokkseyri og gist á Arthostel eina nótt. Nemendasamband Tækniskólans stendur fyrir ferðinni og heldur utan um skemmtidagskrá.

Skipulag og tímasetningar

Farið verður af stað eftir hádegi fimmtudaginn 29. ágúst og komið aftur á hádegi föstudaginn 30. ágúst. Þeir nemendur sem skrá sig í ferðina fá leyfi frá kennslu á meðan á ferðinni stendur. Gert er ráð fyrir því að nemendur mæti í kennslu á fimmtudagsmorgni og eftir hádegi á föstudag.
Lagt verður af stað eins og hér segir: 

• frá Hafnarfirði kl. 15:00,
• frá Skólavörðuholti og Háteigsvegi kl. 15:30.

Æskilegt er að allir nemendur mæti með farangurinn sinn í skólann að morgni, en boðið verður upp á að geyma farangurinn í húsnæði skólans áður en farið er í ferðina. Heimkoma er áætluð kl. 12:00 föstudaginn 30. ágúst og verður hefðbundin kennsla það sem eftir er af föstudeginum.

Þátttakendur þurfa að hafa með sér föt eftir veðri, svefnpoka/sæng, kodda, dýnu/vindsæng, sundföt og svo er öllum frjálst að koma með snarl til að hafa í rútunni og/eða um kvöldið.

Skráning og miðasala:

Miðasala í ferðina fer fram á vef Nemendasambandsins.
Miðaverð er 3000kr. á mann. Innifalið í verðinu er rútuferð fram og til baka, gisting, pylsuveisla, sundlaugapartý, skemmtidagskrá og morgunmatur. Skráning stendur yfir til hádegis 28. ágúst.

Leyfisbréf:

Allir sem fara í ferðina verða að skila inn leyfisbréfi. Hægt er að nálgast bréfin á bókasafni skólans (á Háteigsvegi, í Hafnarfirði og á Skólavörðuholti) og er þeim einnig skilað þangað.

Nýnemar eru hvattir til þess að mæta og taka þátt því ferðin er frábær vettvangur til þess að kynnast félagslífi skólans og samnemendum.