Skólafundur

Samkvæmt lögum um framhaldsskóla skal halda skólafund a.m.k. einu sinni á skólaári en skólafundir eru mikilvægur lýðræðislegur vettvangur fyrir nemendur skólans til að koma sínum málefnum á framfæri.

Skólafundur verður haldinn í Tækniskólanum miðvikudaginn 18. febrúar kl. 10:25–12:05. Þá er kennsla felld niður og nemendur og starfsfólk ræða um ýmis málefni er varða skólann og nemendur.

Athugið að mætingaskylda á skólafund gildir um öll þau sem eru með tíma í stundatöflu kl. 10:25–12:05 þennan dag. Þá hvetjum við aðra nemendur til þess að mæta á skólafund í matsölum skólans á sama tíma.

Gert er ráð fyrir að kennarar haldi fundinn með sínum nemendahópi en einnig er lögð áhersla á að nemendur taki að sér hlutverk fundarstjóra, ritara og tímavarðar í hverri kennslustofu.

Umræðuefni

Umræðuefni á skólafundi koma frá samráðsvettvangi nemenda, kennara og stjórnenda í skólaráði. Á fundinum er nemendum skipt upp í 5–7 manna hópa og eru fjögur málefni tekin fyrir í hverjum hóp.

Spurningarnar eru:

• Hvernig getur skólinn undirbúið nemendur betur fyrir lífið eftir framhaldsskóla ?
• Hvernig getur skólinn komið betur til móts við þarfir hvers og eins nemanda?
• Hvað er hægt að gera til þess að nemendum líði betur í skólanum?
• Hvað vilt þú sjá gert betur í félagslífi skólans?

Upplýsingar fyrir kennara

Verkefnablöð og skriffæri, fyrir hópavinnu skólafundarins, má nálgast á eftirfarandi stöðum:

Skólavörðuholt
Móttaka á 1. hæð

Háteigsvegur
Bókasafn á 4. hæð

Hafnarfjörður
Bókasafn á 2. hæð

Skeljanes
Kaffistofa kennara

Hér er hlekkur á kynningarmyndband fyrir skólafund Tækniskólans 2026.