Glænýtt skólablað sem ber heitið T-ið í TÆKNÓ og var unnið af nemendum í Upplýsingatækniskólanum er komið út.

Í haust fór af stað áfanginn Hönnun blaða og tímarita í Upplýsingatækniskólanum og voru 15 nemendur úr ýmsum deildum skólans skráðir. Nem­enda­hóp­urinn náði sér­lega vel saman og að þeirra sögn gekk vinnan við blaðið eins og vel smurð vél.

Hugmyndasamkeppni var haldin um nafn á blaðið og T-ið í TÆKNÓ bar sigur úr býtum:

Þetta nafn hefur í raun tvær merkingar. Fyrsta merkingin er fyrir bókstafinn T í orðinu Tæknó. Hin merkingin er fyrir T eins og enska orðið „tea“ sem þýðir drama/slúður. Okkur fannst það frumlegt því það hefur fleiri en eina meiningu. Það stendur fyrir drama og slúður sem er að gerast í Tæknó. Það fer bara eftir lesandanum hvernig hann lítur á nafnið.

Endilega kíkið á afraksturinn og er það von þeirra sem stóðu að blaðinu að lesendur hafi ánægju af lestrinum.