Í annarlok fær nemandi einkunn fyrir árangur sinn í sérhverjum áfanga sem hann er skráður í. Fyrirkomulag námsmats og vægi einstakra þátta í námsmatinu (verkefna, vinnuframlags, prófa) kemur fram í kennsluáætlun. Gefnar eru einkunnir í heilum tölum frá 1 til 10. Hverri önn lýkur með lokanámsmatsdegi. Á þessum degi geta nemendur skoðað úrlausnir sínar og verkefni hjá kennara. Sjá nánar VKL-0124.
Námsmat felst í því að leggja mat á þekkingu, leikni og hæfni nemenda. Skólinn beitir fjölbreyttu námsmati til að gefa sem skýrasta mynd af þekkingu nemandans og hæfir efni og innihaldi hennar. Matsþættir eru að lágmarki fimm talsins með allt að 35% vægi hver í heildareinkunn.
Allt skipulag og framkvæmd námsmats er í höndum kennara, bæði í dagnámi og í dreifnámi. Allar upplýsingar um námsmat eru aðgengilegar í Innu.
Í mörgum áföngum eru lykilmatsþættir, einn eða fleiri, og eru þeir merktir sérstaklega. Ef nemandi nær ekki lágmarkskröfu eða mætir ekki í próf af viðurkenndum ástæðum þá gefst honum annað tækifæri til að vinna matsþáttinn. Nýti nemandinn ekki það tækifæri, eða nær ekki lágmarksárangri, þá hefur hann ekki staðist áfangann og verður að sitja hann aftur.
Veikindi eða slys geta hindrað eða truflað vinnslu matsþáttar. Þegar nemandi á rétt á öðru tækifæri til að vinna matsþátt sem hann missti af vegna veikinda/slyss (gildir um alla matsþætti), þá ber nemanda að tilkynna um veikindi sín samdægurs í Innu (og yfirsetumanns ef veikindi koma upp í prófi) og um leið sækja um endurtöku matsþáttarins hjá viðkomandi kennara. Sé reglum þessum ekki fylgt á nemandi ekki rétt á endurtöku á matsþætti. Önnur forföll sem hindra vinnslu matsþátta má ræða við kennara sem vegur og metur sérhvert tilvik.
Kennari getur gert kröfu um að próf skuli tekið í skólanum sjálfum eða á viðurkenndum próftökustað (með viðurkenndri yfirsetu). Nemandi getur óskað eftir því við kennara að taka prófið á slíkum viðurkenndum próftökustað, sjá neðst. Fái hann heimild til þess hjá kennara þá snýr hann sér til prófstaðar með góðum fyrirvara og óskar eftir því að fá að taka próf á þeim degi og á þeim tíma sem prófið verður lagt fyrir. Vakin er athygli á því að kostnaður getur hlotist af slíkri próftöku og ber nemandi þann kostnað sjálfur. Próf sem tekin eru með þessum hætti eru lögð fyrir í Innu og nálgast nemandinn prófið þar og skilar að prófi loknu. Prófið er tekið undir eftirliti yfirsetuaðila á prófstað sem ber að tryggja að réttur próftaki sé á ferð (nemandi þarf að framvísa persónuskilríkjum) og að einungis leyfileg gögn séu notuð.
Nemendur verða að mæta tímanlega á prófstað, lokað er 10 mínútum eftir að próf hefst. Próftaka er óheimilt að hafa á borði neitt annað en þau gögn sem leyfileg eru samkvæmt upplýsingum á forsíðu prófs. Heyrnartól eru óheimil (nema annað sé tekið fram), símar og önnur tæki skulu vera stillt á hljóðlaust, og ganga skal frá persónulegum munum á gólfi þannig að próftaki geti yfirgefið prófstað án mikillar truflunar fyrir aðra. Nemendur skulu í upphafi prófs ganga úr skugga um að prófgögn þeirra séu rétt. Ekki er heimilt að yfirgefa prófsal fyrr en eftir að hálftími er liðinn af próftíma og halda skal salernisferðum í algjöru lágmarki á meðan á próftöku stendur (en skilja þá alla persónulega muni eftir í prófsal, þar á meðal síma og önnur tæki, ef próftaki þarf að fara á salernið í prófi). Nemendum er óheimilt að ávarpa hvern annan í prófi og er ekki ætlast til að próftakar láti kalla til kennara (þó hann geti mögulega komið við í prófsal einu sinni eða svo). Í lok prófs skulu próftakar skila prófverkefni og öllum blöðum vel merktum til yfirsetuaðila og yfirgefa prófsalinn tafarlaust og með sem minnstri truflun fyrir aðra. Próftaki gæti þurft að framvísa skilríkjum í upphafi eða við lok prófs.
Viðurkenndir prófstaðir eru símenntunarmiðstöðvar, framhaldskólar og aðrar viðurkenndar menntastofnanir. Nemendur verða að fá próftöku sína samþykkta á viðurkenndum prófstað með góðum fyrirvara (bæði hjá skólanum og prófstaðnum), mæta svo á réttum tíma á prófstað, hafa meðferðis persónuskilríki með mynd og greiða prófstaðnum fyrir þjónustuna.
Uppfært 13. ágúst 2025
Áfangastjórn