Kjarni: 183 einingar

Nem­endur taka alla kjarna­áfanga með sínum bekk. Þeir eru kenndir af kenn­urum braut­ar­innar og kennsla fer fram á K2-gang­inum á Skólavörðuholti eða í húsnæði HR við Öskjuhlíð.

Í kjarna er lögð áhersla á stærðfræði og raun­greinar og taka nem­endur til að mynda 35 ein­ingar í stærðfræði og 15 ein­ingar í eðlisfræði. Úrval áfanga í nátt­úru­vís­indum er sömuleiðis fjöl­breytt og leggja kenn­arar sig almennt fram við að tengja efni áfanga sinna við áherslusvið braut­ar­innar. Kemur þetta til að mynda skýrt fram í áfang­anum Vís­inda- og menn­inga­saga og síðasta íslensku­áfanga braut­ar­innar þar sem lögð er áhersla á mál­tækni, vélþýðingar og fleira. Áfanginn er unninn í sam­vinnu við HR.

Alls eru 20 ein­ingar í íslensku á braut­inni og 20 ein­ingar í ensku. Nem­endur taka einn áfanga í dönsku og þriðja tungu­málið er spænska, alls 15 ein­ingar. Í kjarna eru einnig spenn­andi áfangar í nýsköpun, frumkvöðlafræði, verksmiðju (rökrásaforritun) og upplýsingatækni.

Sjá námsskipulag brautar

 

Lokaverkefni

Síðustu tvær vikur hverrar annar er hefðbundin stunda­skrá tekin úr sam­bandi og nem­endur ein­beita sér að svo­kölluðum loka­verk­efnum. Loka­verk­efnin eru metin til þriggja eininga.

Um er að ræða sjálfstæð rann­sókn­ar­verk­efni sem unnin eru í sam­starfi við aðrar brautir skólans, aðra skóla, stofn­anir, bæj­ar­félög eða fyr­ir­tæki, undir leiðsögn og for­ystu kennara brautarinnar. Meðal sam­starfsaðila eru Landvernd, Háskóla Íslands og Ungir vísindamenn, CCP, Snjall­borgin Reykjavík, Stúdíó Sýr­land, Össur, Lýsi og Umhverf­is­stofnun. Lagt er upp með ákveðið þema sem nem­endur vinna út frá. Unnið er í hópum og verk­efninu lýkur með kynn­ingu og vörn.

Loka­verk­efnin eru ákaf­lega fjöl­breytileg og nem­endur hafa mjög frjálsar hendur við útfærslu þeirra. Sem dæmi um verk­efni nem­enda má nefna rann­sóknir á hulsum fyrir gervilimi, áætlun um innleiðingu svifnökkva fyrir græna og væna borg, stutt­myndir sem unnar voru með Stúdíó Sýr­landi og tölvu­leikjagerð.

 

Gæfuspor – Lífsleikni

Lífsleikniáfangar K2 kallast Gæfuspor. Þeir eru 3 talsins og kenndir á haustönn. Í fyrsta áfanganum er lögð áhersla á aðferðir og vinnubrögð í framhaldsskólanámi; heimildir, heimildaleit og gagnrýnin hugsun, rannsóknarspurning o.s.frv. Í öðrum áfanganum er rýnt í rannsóknir og siðferði: Hvað má rannsaka? Þriðji áfanginn snýr að framtíðinni – því sem tekur við að námi loknu.

 

Íþróttir

4 íþróttaáfangar eru á brautinni. Nemendur geta farið í hefðbundnar íþróttatíma en margir kjósa að nýta sér þær íþróttir, sem þeir þegar stunda, og skila inn vottorði og yfirliti um íþróttaiðkun til íþróttakennara nokkrum sinnum yfir önnina. Nemendum stendur einnig til boða að sækja líkamsræktarstöðvar og fá metið til eininga í íþróttum.

 

Val: 27 einingar

Valáfangar eru 27 ein­ingar. Námið í Tækni­skól­anum er fjöl­breytt og þar gefst góður kostur til að sníða stúd­ents­námið að eigin áhugasviði. Nem­endur geta tekið valáfanga af öllum brautum Tækni­skólans, svo lengi sem þeir hafa lokið nauðsyn­legum und­an­förum og pláss er í hópum. Einnig eru í boði sérhannaðir valáfangar sem kenndir eru eingöngu innan brautar, svo sem vefforritun, rafíþróttir, sjálfstætt rannsóknarverkefni, fjármálafræði og stjörnufræði.

Nem­endur hafa tekið valáfanga í tungu­málum, kerf­isfræði, prentun, ljós­myndun, bók­bandi, upp­lýsinga­tækni, sögu, róbótafræðum, félagsfræði og efnafræði, svo eitthvað sé nefnt. Nem­endur geta byrjað að taka valáfanga strax á ann­arri önn. Þá hefur nem­endum á brautinni staðið til boða að sækja nám­skeið í stærðfræði við Háskólann í Reykjavík. Þeir sem ljúka nám­skeiðinu útskrifast því með nokkrar háskóla­ein­ingar í farteskinu. Sam­starfið við HR er í sífelldri mótun og lík­legt að nem­endur á K2 muni einnig geta sótt fleiri nám­skeið í framtíðinni.

Á útskriftarönn stendur nem­endum til boða að sækja sér­stakan undirbúningsáfanga í gerð rann­sókn­ar­ritgerða (litla BA-smiðjan) þar sem þeir þjálfa sig í vís­inda­legum og fræðilegum vinnu­brögðum fyrir háskólanám og aðferðafræði rannsókna.