Innsýn í námið
Skapandi hönnun og tækni
Grafísk miðlun er fjölbreytt og hagnýtt nám, og jafnframt skemmtileg leið til stúdentsprófs. Með tilkomu nýrrar námskrár læra nemendur að hanna og setja fram efni fyrir prent-, net- og skjámiðla, ásamt því að kynnast öllu vinnsluferli á prentgripum.
Í dag gerir atvinnulífið þá kröfu að nemendur fái góða yfirsýn í náminu og geti tekið að sér fjölbreytt störf á sviði upplýsingagreina í framtíðinni.
Í verkefnum námsins er m.a. unnið með hreyfimyndagerð, vefvinnslu, grafíska vinnslu, myndvinnslu, umbrot, tæknilegan frágang, prentun og bókband.
Dæmi um verkefni í náminu:
- Bækur
- Tímarit
- Bæklingar
- Nafnspjöld
- Veggspjöld
- Auglýsingar fyrir alla miðla
- Umbúðir og merkingar
Nemendur læra að vinna alla verkþætti, þar á meðal lokafrágang, prentun og bókband.
Brautarlýsing
GFM25 Grafísk miðlun
Nám í grafískri miðlun er 150 einingar í skóla sem eru 5 annir í fullu námi. Eftir það gefst nemendum kostur á að taka 50 einingar til viðbótar og útskrifast með stúdentspróf eða að fara í starfsþjálfun á vinnustað sem gefur kost á að þreyta sveinspróf. Námið skiptist milli almennra greina og faggreina og eru námslok á 3. hæfniþrepi.
Markmið námsins er að nemendur öðlist þá þekkingu og færni sem grafískum miðlurum er nauðsynleg í því fjölbreytta tækni og sköpunar umhverfi sem er í greininni í dag. Í náminu læra nemendur að vinna grafíska vinnslu fyrir hina ýmsu miðla og fá þjálfun í hugmyndavinnu og nauðsynlegri tækni til að útfæra hugmyndir og fullvinna verk.
Almennar upplýsingar
Inntökuskilyrði
Nemendur þurfa að hafa lokið skyldunámi í samræmi við ákvæði aðalnámskrár grunnskóla með lágmarkseinkunn C í íslensku, ensku og stærðfræði.
Starfsþjálfun – ferilbók í grafískri miðlun
Starfsþjálfun hjá fyrirtæki/iðnmeistara er samkvæmt hæfnikröfum ferilbókar að hámarki 32 vikur. Gera þarf ráð fyrir þeim tíma í skipulaginu. Starfsþjálfun er hluti af námsbrautinni og er metin til eininga. Nemendur sem skrá sig í starfsþjálfun (á námssamning) eru einnig skráðir í skólann á meðan þeir vinna að hæfnikröfum ferilbókar á starfsþjálfunartímabilinu. Starfsþjálfun þarf einnig að ljúka eins og öðrum áföngum brautarinnar til að útskrifast. Útskrift af námsbrautinni veitir rétt til að þreyta sveinspróf í framhaldinu.
Námsframvinda vinnustaðarnáms
Nemendur skipuleggja starfsþjálfun í samráði við meistarann/fyrirtækið og með hliðsjón af námsskipulagi brautarinnar.
Að loknu námi
Prófskírteini af fagbraut ásamt því að starfsþjálfun sé lokið, veitir rétt til að sækja um sveinspróf í viðkomandi grein. Sveinspróf veitir rétt til að hefja nám í Meistaraskóla.
Einnig er hægt að ljúka viðbótarnámi til undirbúnings námi á háskólastigi en slíku námi lýkur með stúdentsprófi.
Starfsvettvangur prentsmiða/grafískra miðlara er til dæmis hjá prentfyrirtækjum, auglýsingastofum, blaðaútgáfum, innan markaðsdeilda fyrirtækja og sem sjálfstæður atvinnurekandi.
Verkefni nemenda
T-ið í TÆKNÓ
Glænýtt skólablað
Grafísk miðlun
Útskriftarsýning og Askur
Útskriftarvefur nemenda í grafískri miðlun
Útskriftarvefur nemenda í grafískri miðlun
Tímarit nemenda
í grafískri miðlun
Askur
Umsagnir
Alexandra Sharon Róbertsdóttir útskrifaðist með sveinspróf og stúdent
„Ég finn það vel í háskólanáminu hversu gott það er að hafa lært grafíska miðlun. Margir í mínu námi höfðu engan grunn né þekkingu áður en þau komu í háskólanám en þetta hefur hjálpað helling. Mér finnst líka mjög mikilvægt að við höfum fengið að læra um prentiðnaðinn vegna þess að hann skiptir alveg jafn miklu máli og hönnunarferlið.“
Hugrún Rúnarsdóttir fór í Vefskólann og stofnaði fyrirtæki með vinkonu sinni sem sérhæfir sig í vefhönnun og forritun
„Námið í grafískri miðlun var frábært og því að þakka að ég kynntist forritun og vefsíðugerð. Hönnun, letur, myndvinnsla, textavinna, grunnur í HTML og CSS og margt fleira er allt sem ég nota daglega og kemur frá grafískri miðlun. Þessi tvö nám tvinna rosalega vel saman og ég hefði aldrei viljað sleppa því að fara í grafíska miðlun þrátt fyrir að ég einbeiti mér núna meira af vefnum en ekki prenti.“
Embla Rún Gunnarsdóttir kláraði námið árið 2017
„Ég lærði ótrúlega margt gagnlegt í grafískri miðlun en það besta sem námið gaf mér var tækifæri til að þroskast sem hönnuður. Ásamt því að vera í námi vinn ég sem skjáhönnuður hjá sprotafyrirtækinu Taktikal. Við sérhæfum okkur í að hjálpa fyrirtækjum að komast inn í stafræna framtíð.“
- Fór í háskólanám í grafískri hönnun og frumkvöðlafræði
- Stofnaði fyrirtæki í vefhönnun og forritun
- Fór í Vefskólann eftir grafíska miðlun
FAQ
Spurt og svarað
Er öruggt að ég komist í starfsþjálfun / á samning til að klára námið?
Sjá nánar um ferilbók og vinnustaðanám
Hvað kostar námið?
Sjá upplýsingar um skólagjöld í gjaldskrá Tækniskólans.
Er námið lánshæft?
Menntasjóður námsmanna veitir allar upplýsingar um lánshæfi náms á menntasjodur.is
Eru efnisgjöld?
Nei, efnisgjöld eru innifalin í skólagjöldum.
Hvenær hefst kennsla?
Sjá upplýsingar í skóladagatali hér á vefnum.
Hvar fer kennslan fram?
Kennsla í grafískri miðlun fer fram í Sjómannaskólahúsinu Háteigsvegi. En einnig fara nemendur á sérsviðinu út í fyrirtæki.
Er mætingarskylda?
Já, nánari reglur um skólasókn er að finna hér á vefnum.
Er nemendafélag?
Upplýsingar um félagslíf og nemendafélag eru á síðu um félagslíf.