Innsýn í námið
Spennandi og krefjandi stúdentsnám
K2 tækni- og vísindaleið Tækniskólans er framsækið þriggja ára stúdentsnám í bekkjakerfi þar sem megináhersla er á verkefnavinnu, lausnaleit og gagnrýna og skapandi hugsun. Í bekkjakerfi sækja nemendur áfanga í öllum kjarnagreinum með sínum bekkjarfélögum í sinni heimastofu og vinnustofu. Nemendur sækja fjölbreytta valáfanga, á brautinni sjálfri sem og þvert á aðrar brautir Tækniskólans. Sérstök athygli er vakin á því að í boði er að taka bóklegan hluta einkaflugmannsnámsins sem stóran hluta af vali (15 einingar), þá á lokamisserinu.
Námið er skipulagt í samstarfi við Háskólann í Reykjavík og leiðandi fyrirtæki og stofnanir á sviði umhverfisfræði, vísinda, tækni og nýsköpunar. Markmið brautarinnar er að gefa skapandi og sjálfstæðu námsfólki tækifæri til að fást við krefjandi verkefni á frumlegan og áhugaverðan hátt, tengjast háskólaumhverfinu og efla tengslanet sitt í atvinnulífinu. K2 tækni- og vísindaleið er tilvalin braut fyrir þá sem vilja njóta þess að stunda nám sitt í bekkjakerfi en jafnframt nýta sér alla þá kosti sem áfangaskóli, með miklu og fjölbreyttu námsframboði, hefur upp á að bjóða.
Nemendur taka á námsferli sínum þátt í fjölmörgum þverfaglegum sérverkefnum. Um er að ræða bæði innlent og erlent samstarf. Nemendahópurinn hefur jafnframt verið áberandi í hinum ýmsu innlendu og alþjóðlegu keppnum á sviði tækni og vísinda og hefur meðal annars unnið tvisvar til aðalverðlauna í YRE (Young Reporters for the Environment) sem Landvernd/FEE stendur fyrir árlega og í Evrópska tölfræðimótinu.
Brautarlýsing
K2-21 Tækni- og vísindaleið
Tækni- og vísindaleið er stúdentsbraut þar sem hugað er sérstaklega að því að námið sé áhugavekjandi, ögrandi og eflandi. Námsbrautin er gerð í samræmi við aðalnámskrá framhaldsskóla og samkvæmt leiðbeinandi viðmiðum frá mennta- og menningarmálaráðuneytinu. Skipulag og uppbygging brautarinnar var unnin í samstarfi við Háskólann í Reykjavík og samstarfsaðila úr atvinnulífinu. Þróun brautarinnar á komandi árum miðar við áframhaldandi samstarf þessara aðila. Kennsla við brautina fer fram í lotum.
Almennar upplýsingar
Inntökuviðmið
Ef umsóknir nýnema um skólavist á K2 tækni- og vísindaleið eru fleiri en hægt er að verða við er reiknuð meðaleinkunn íslensku, ensku og stærðfræði og umsóknum raðað eftir þeirri meðaleinkunn. Við mat á umsóknum er jafnframt litið til styrkleika hvers og eins en mikið er lagt upp úr því að hafa fjölbreyttan nemendahóp.
Fyrirspurnir varðandi inntöku og annað brautartengt skal senda til brautarstjóra, Sigríðar Halldóru Pálsdóttur, shp@tskoli.is.
Að námi loknu
Náminu lýkur með stúdentsprófi. Námið er tækni- og vísindamiðað en einnig er lögð mikil áhersla á verkefnastjórnun, nýsköpun og frumkvöðlahugsun.
Verkefni nemenda
Áhugavert evrópusamstarf
Orkumál með áherslu á græna orku og sjálfbærni
Lokaverkefni á K2
Öflugt skólaþróunarstarf
Staða hinsegin fólks í Póllandi
Regnbogaplágan
Heimildarmynd um kolefnisspor á netinu
Mengun með miðlum
Skipulag
- Námsbrautin
- Námsbrautarreglur K2
- Kynningarefni
Kjarni: 183 einingar – Nemendur taka alla kjarnaáfanga með sínum bekk. Þeir eru kenndir af kennurum brautarinnar og kennsla fer fram á K2-ganginum á Skólavörðuholti eða í húsnæði HR við Öskjuhlíð.
Lokaverkefni (hluti af kjarna) – Síðustu tvær vikur hverrar annar er vikið frá hefðbundinni stundaskrá og nemendur einbeita sér að svokölluðum lokaverkefnum, sem eru metnaðarfull verkefni unnin í samstarfi við valda aðila í fræðasamfélaginu og atvinnulífinu.
Valáfangar eru 27 einingar.
K2 tækni- og vísindaleið fylgir sömu skólareglum og aðrar námsbrautir Tækniskólans. Einnig gilda sérstakar námsbrautarreglur um brautina.
FAQ
Spurt og svarað
Hvernig sæki ég um?
Sótt er um nám á K2 með því að smella á hnappinn „Sækja um“ hér að ofan. Allar umsóknir fara í gegnum Menntagátt.
Hvað kostar námið?
Upplýsingar um skólagjöld er að finna í gjaldskrá Tækniskólans. Fyrir utan skólagjöld mega nemendur á K2 búast við því að leggja út fyrir ýmsum námsgögnum auk þess sem þeir þurfa að eiga fartölvu.
Eru efnisgjöld?
Bein efnisgjöld eru engin en nemendur á K2 gera ráð fyrir að leggja út fyrir ýmsum námsgögnum auk þess sem þeir þurfa að eiga fartölvu. Með námsgögnum er til að mynda átt við gjöld vegna námsferða, kostnað vegna menningarferða, kaup á tölvuforritum, tölvubúnaði, bókum/bókahlutum eða greinum.
Hvenær hefst kennsla?
Upplýsingar um upphaf og lok kennslu er að finna á skóladagatali hér á vefnum. Alla jafna hefst kennsla að hausti í seinni hluta ágústmánaðar og í fyrstu viku janúar á vorönn.
Hvar fer kennslan fram?
Kennsla á K2 fer fram í aðalbyggingu Tækniskólans á Skólavörðuholti og í Háskólanum í Reykjavík. Að auki fara nemendur í ýmis ferðalög og vettvangsheimsóknir, bæði í Reykjavík og víðar.
Þarf ég að vera með tölvu?
Nemendur á K2 þurfa að koma með eigin tölvu til að vinna á.
Er mætingarskylda?
Já, nánari reglur um skólasókn má finna á vef Tækniskólans.
Er nemendafélag?
Nemendasamband Tækniskólans, NST, heldur viðburði og skemmtanir fyrir alla nemendur. Minni nemendafélög halda utan um viðburði sem ætlaðir eru nemendum í ákveðnum undirskólum eða brautum Tækniskólans. Þá eru ýmsar nefndir starfandi undir hatti NST, svo sem jafnréttisnefnd, skemmtinefnd og tækninefnd.
Nánari upplýsingar um nemendafélögin er að finna á síðu um félagslífíð.